बार्सिलोनाले तोड्यो २७ वर्षअघिको रेकर्ड, मेस्सीको ह्याट्रिक

फागुन २१ – बार्सिलोनाले २७ वर्षअघिको स्पेनिस ला लिगाको एउटा रेकर्ड तोडेको छ । बिहीबार राति भएको खेलमा रायो भालेकानोलाई ५–१ गोल अन्तरले पराजित गर्दै बार्सिलोना लगातार ३५ खेलमा अपराजित रहेको हो । यसअघि लगातार धेरै खेलमा अपराजित रहेको रेकर्ड रियल मड्रिडको रहेको थियो । 
बार्सिलोनाका लागि लियोनल मेस्सीले ह्याट्रिक गरे । डिएगो लोरेन्टे र म्यानुअल लिटुर्राले रेर्ड कार्ड पाएपछि भालेकानो ९ खेलाडिमा सिमित भएको थियो । 
जितसँगै बार्सिलोना ८ अंकको अग्रतासहित अंकतालिकामा शीर्ष स्थानमा पुगेको छ । बार्सिलोनाका लागि इभान र्याकिटिक र लुइस स्वारेजले १/१ गोल गरे । बिहीबारको ह्याट्रिकसँगै मेस्सीले रियल मड्रिडका स्ट्राइकर क्रिस्टियानो रोनाल्डोको ३५ ह्याट्रिकसँग बराबरी गरेका छन् ।